Gözləyin...
Bələdiyyə xəbərləri 17-11-2026 296

Xətai Bələdiyyəsi vətəndaşlara xidmətin rəqəmsallaşdırılması və “myGov” platformasının təşviqinə dəstək verir

Xətai Rayon Xətai Bələdiyyəsi dövlət xidmətlərinin rəqəmsallaşdırılması, vətəndaşlara göstərilən xidmətlərin əlçatanlığının artırılması və müasir texnologiyaların gündəlik həyatda tətbiqinin təşviqi istiqamətində fəaliyyətini davam etdirir.

Bu istiqamətdə Azərbaycan Respublikasının dövlət xidmətlərinin elektronlaşdırılması sahəsində həyata keçirdiyi siyasətə dəstək olaraq “myGov” platformasının əhali arasında təbliği və istifadəsinin genişləndirilməsi məqsədilə maarifləndirmə və praktiki köməklik işləri aparılır.

Xətai Bələdiyyəsinin əməkdaşları vətəndaşlarla birbaşa ünsiyyət zamanı “myGov” platformasının imkanları barədə ətraflı məlumat verir, tətbiqdən istifadə qaydalarını izah edir və ehtiyacı olan şəxslərə yerində praktiki yardım göstərirlər. Belə ki, smartfonlarında tətbiq olmayan vətəndaşlara “myGov” mobil tətbiqinin telefonlarına yüklənməsi, qeydiyyat və istifadə prosesində köməklik edilir.

Bu yanaşma xüsusilə rəqəmsal xidmətlərdən istifadə etməkdə çətinlik çəkən vətəndaşların dövlət xidmətlərinə daha rahat çıxışını təmin etməyə, vaxt itkisinin qarşısını almağa və xidmət prosesini sadələşdirməyə xidmət edir.

Xətai Bələdiyyəsinin sədri Elşad Vəliyev çıxışında bu təşəbbüsün əhəmiyyətini xüsusi vurğulayaraq bildirib ki, müasir dövrdə vətəndaş məmnunluğunun təmin olunması, xidmət keyfiyyətinin yüksəldilməsi və rəqəmsal imkanlardan səmərəli istifadə hər bir dövlət və yerli özünüidarəetmə qurumunun qarşısında duran mühüm vəzifələrdəndir.

Sədr qeyd edib ki, dövlətimizin həyata keçirdiyi rəqəmsal inkişaf siyasətinə dəstək vermək, vətəndaşların elektron xidmətlərdən istifadəsini asanlaşdırmaq və bu sahədə maarifləndirmə işlərini gücləndirmək Bələdiyyənin fəaliyyətində prioritet istiqamətlərdən biri olmalıdır. O, əməkdaşlara vətəndaşlara yalnız məlumat verməklə kifayətlənməməyi, eyni zamanda ehtiyac yarandıqda yerində praktiki köməklik göstərməyi tövsiyə edib.

Elşad Vəliyev onu da vurğulayıb ki, əsas məqsəd vətəndaşın dövlət xidmətlərindən daha rahat, operativ və əlçatan şəkildə yararlanmasına töhfə vermək, rəqəmsal yeniliklərin cəmiyyətin bütün təbəqələri üçün faydalı olmasına nail olmaqdır.

Xətai Bələdiyyəsi bundan sonra da rəqəmsal transformasiya prosesinə dəstək göstərərək, “myGov” platformasının imkanlarının təşviqi, vətəndaşların maarifləndirilməsi və xidmət keyfiyyətinin yüksəldilməsi istiqamətində fəaliyyətini davam etdirəcək.


Oxşar Xəbərlər

Bələdiyyə sədri

Vəliyev Elşad Vilayət oğlu
Xətai Rayonu Xətai Bələdiyyəsinin sədri


Vəliyev Elşad Vilayət oğlu 11 aprel 1978-ci ildə Naxçıvan Muxtar Respublikasının Ordubad rayonunun Xanağa kəndində anadan olmuşdur.
1995-ci ildə Naxçıvan Dövlət Universitetinin İqtisadiyyat fakültəsinə qəbul olmuş, 1999-cu ildə həmin ali təhsil müəssisəsini iqtisad ixtisası üzrə bitirmişdir. Təhsilini davam etdirərək 2003-cü ildə Azərbaycan Respublikasının Prezidenti yanında Dövlət İdarəçilik Akademiyasına qəbul olunmuş, 2006-cı ildə həmin akademiyanı müvəffəqiyyətlə başa vurmuşdur.
Əmək fəaliyyətinə 22 may 2001-ci il tarixində Yasamal Rayon Əhalinin Sosial Müdafiəsi Mərkəzində müfəttiş vəzifəsində başlamışdır. Peşəkar fəaliyyəti və məsuliyyətli xidməti nəzərə alınaraq 15 fevral 2002-ci il tarixində həmin qurumda baş müfəttiş vəzifəsinə təyin edilmişdir.
03 may 2007-ci il tarixindən etibarən Dövlət Sosial Müdafiə Fondunun Hərbi Qulluqçular və Xüsusi Dərəcəli Şəxslərlə İş Departamentində baş məsləhətçi vəzifəsində çalışmış, sosial müdafiə sahəsində dövlət siyasətinin həyata keçirilməsi istiqamətində mühüm fəaliyyət göstərmişdir.
01 may 2017-ci il tarixindən 12 sentyabr 2019-cu il tarixinədək Dövlət Sosial Müdafiə Fondunun Xətai rayon şöbəsində baş məsləhətçi vəzifəsində fəaliyyətini davam etdirmiş, vətəndaşlara göstərilən sosial xidmətlərin təşkili və idarə olunmasında yaxından iştirak etmişdir.
23 dekabr 2019-cu il tarixində keçirilmiş bələdiyyə seçkilərində Xətai Bələdiyyəsinin üzvü seçilmişdir. 15 yanvar 2020-ci il tarixində keçirilmiş bələdiyyə iclasının qərarı ilə Xətai Bələdiyyəsinin sədri vəzifəsinə seçilmişdir. 29 yanvar 2025-ci il tarixində keçirilmiş bələdiyyənin ilk iclasında yenidən Xətai Bələdiyyəsinin sədri seçilərək ikinci dəfə bu vəzifəyə etimad göstərilmişdir.
Sədr kimi fəaliyyəti dövründə Xətai rayonunda abadlıq və quruculuq işlərinin genişləndirilməsi, park və yaşıllıq sahələrinin salınması, məhəllələrin abadlaşdırılması,  xidmətlərin təkmilləşdirilməsi, sosial layihələrin həyata keçirilməsi, şəhid ailələri, müharibə veteranları və aztəminatlı ailələrə dəstək göstərilməsi istiqamətində ardıcıl və məqsədyönlü fəaliyyət göstərmişdir. Onun rəhbərliyi ilə bələdiyyədə vətəndaş müraciətlərinə operativ baxılması, şəffaf idarəetmə prinsiplərinin tətbiqi və yerli özünüidarəetmə institutunun inkişafı istiqamətində mühüm işlər görülmüşdür.

Vəliyev Elşad Vilayət oğlu Yeni Azərbaycan Partiyasının üzvüdür. Rus və ingilis dillərini bilir.
Ailəlidir, bir övladı var. 

Son Xəbərlər